31-7-2008

نهير فين ؟؟؟

نهير في فرحها....آه والله بجد

عامله نفسها عروسه....ورامي عامل نفسو عريس

والكارثه الاعظم ان فيه ناس صدقوا الاشتغاله وراحوا يحضروا الفرح بقى وكده

انا فعلاً حقيقي مش مستوعبه

العروسه........نهير

نهير.....اعرفها انا من ييجي 3 سنين او اكتر دلوقتي

نهير اول مره قابلتها في الازهر بارك....يوم عيد الحب :)))

نهير كل مره اشوفها تجيبلي حاجه واديها انا حاجه

كلها حاجات عبيطه...مصاصه...كارت...قلم

حتى في مره ادتني كشكول محاضراتها

نهير.....مش عارفه

صعب اوووي صعب اووووي اووووي

تكتب عن حد قريب ليك بالدرجه اللي نهير قريبه ليا بيها

نهير من الاشخاص اللي انا واثقه انهم باقيين ليا عمري كلو

بنلف ونروح ونيجي...واحنا زي مااحنا

البنت دي بتعرفني من كلمه في مسج

من الو....او من دحكه مش مظبوطه

من كلمه في وسط كلام اهبل....من اغنيه بسمعها

عدينا حدود كتير اووووي....ودخلنا في بعض اوي

ونهير انهارده هناك...مع رامي

وهتروح معاه

وانا هنا....على النت

قهراً....والله قهراً

انا عيطت عياط غير طبيعي انهارده

في حين اني المفروض اكون فرحانه لانها اكيد بتدحك اوووي

بس كان نفسي بجد اكون معاها واشوف دحكتها دي

كان نفسي اشوفها وهي لابسه فستان ابيض

وحاطه راسها على كتف رامي وبيرقصوا سلو على شيرين وهي بتغني بكلمه منك

كان نفسي اطلع في الصور عشان لما تيجي تتفرج على الصور تلاقيني

كان نفسي آكل من التورته وارقص معاها ومع روجا

كان نفسي اوووي اوووي اووووي

بس انا فرحانه....اكيد فرحانه....عشان هي فرحانه

واحنا متعودين على اننا بنحس ببعض

وانا حاسه دحكتها بتيجي على شفايفي

اكيد مش ده اللي كنت عايزه اقوله....كان نفسي اقول اكتر من كده بكتير

كان نفسي الاقيلك كلام يقولك انتي ايه عند وئام....كان نفسي تعرفي بجد

بس انا عارفه انك عارفه....ياريتني كنت اعرف كل الناس انتي ايه عندي

انتي حد ما يتعوضش...كل الايام اللي عشتها معاكي

كل الحاجات اللي عرفتها معاكي

كل حاجه ماتتعوضش...وماتنفعش تكون مع حد غيرك

عمري ما هفرط فيكي...ولا هبعد عنك ولا هخسر اي حاجه كسبتها معاكي

سامحيني....

وبحبك دي ماينفعش تتقال.....لان اللي بيني وبينك عدا كلمه بحبك بكتييير

ربنا يسعد ايامك ويهنيكي عمرك كلو يا عمري

قولتيلى أكتبى

انا جيـــــــــت
لما حسيت أنى جوايا حاجات كتير أوى جيـت
جيت لما أفتكرت أن أول موضوع فى البلوج ده كان حدث خاص بالنسبة ليا عشان كده اوما خلتنى انا اللى افتتحه
وبما انى همر بحدث خاص تانى قريب أوى كان لازم احن واجى تانى
بدايةً أنا دلوقتى كسلانة جداً وعايزة انام وحالتى صعبة عشان كده اى كلام هيخرج منى ممكن نعتبره تحت تأثير البنج

نهير
يختى كميلة
فرحك بعد 29 يوم

لألألألأ متقولوش كده

نهير عايز 5 صور وصورتين للبطاقة
ليه
يعنى ايه ليه عشان احجز المأذون
مأذون ايه هو انا هتجوز ولا ايه


هبقى عروسة
والبس فستان أبيض
وأرقص سلو
وكل الناس هتشوفنى وانا امورة
مش يهمنى ان كل حاجة تبقى بيرفكت كده وزى ما الكتاب قال
أهم حاجة ابقى مهيسة ومبسوطة
والهم ابقى انا
حاسة انى هعمل مصايب يوم الفرح
وانى هجرى وأضحك واتقمص ولا أعيل عيلة

نفسى يستحملنى
يفضل يحبنى زى ما أنا
يعاملنى زى ما انا هعامله وزى ما انا عايزاه يعاملنى
يطمنى
يحتوينى
يحسسنى انى مالكة الدنيا وما فيها بيه
مبقاش خايفة طول ما ايديا فى ايديه
ميسمحليش انه يغيب عن نظرى لحظة
أحلام مش صعبة وانا مصدقاها
زى ما انا مصدقة ان كل ده فى إيدى

لما شفتك اتولد إحساس جديد
لما شفتك حسيت انى واحدة تانية
عايزة اضحك وأجرى واتنطط وأبقى هبلة يعنى ودى حاجة مش هبذل فيها مجهود كتير
عارفة الطفل لما يشوف حد بيحبه وتلاقيه باصصله على طوول ومبتسمله
عشان كده كنت باصالك على طوول
مينفعش اقولك انك فرقتى فى يومى كتير لأنى من اول ما عرفتك وانتى فارقة فى حياتى كلها
شايفاكى وانتى بتبتسمى ابتسامة لذيذة من بتوعك وانتى بتقرى التوبيك
بصى بجد أصل الكلام يعنى مش هيقول حاجة
عايزة اقولك انى امبارح كنت طايرة بالألبوم والشمعدان وقعدات احاول انفخ فى البلالين
والبرفان يجنن على فكرة
وقعدت فرجت كل اللى جه عليهم
بيقولولك انتى ذوق أوى على فكرة

شاردة شوية , قلقانة حبتين , بسرح كتير , بحبك أوى

مستنى ايه...امــشي

الحلم مانفعش

فوق من خيالك فوووووق

انسى بقى وامشي

اقفل على قلبك كفايا تجرحو

وتعلقه بحبال اماني تطوحو

من انهرده الحلم مش هيفرحو

ارجوووك....ماتحــلمش

So what !?

Just Waiting...

For some one...

May - NEVER - Come !

سارح في غربه...بس مش مغترب

ماشيه في الشارع...مش عارفه رايحه فين ولا عارفه ماشيه لحد امته
شارع زحمه وناس رايحه وناس جايه
عماله بتفرج على الناس وكأني بدور على حاجه....جايز بدور على حد شبهو...جايز بقرا وشوش الناس وخلاص
بنت وولد ماشيين واديهم في ادين بعض..بس عنيهم كدابه..هم الاتنين بيشتغلوا بعض..باين جداً انهم بس بيعيشوا الدور
زهقت من مناظر الناس..زهقت من الوشوش المكشره والعيون الكدابه
كل الناس اشتركوا في تشكيره واحده ونظره عدوانيه واحده
زهقت من الاغاني الكئيبه اللي على الام بي ثري اللي عماله بسمعها
شجر اللمون...دايره الرحله...اد ايش كان فيه ناس
بفضل اقلب في الام بي ثري لحد اما الاقيها...اديا في جيوبي
بنكشح وافضل اغني معاها واشوف كل الوشوش المكشره سراب مالوش تاثير عليا
تبدأ خطوتي تسرع وابدأ اغني مع منير...وحدي لكن ونسان وماشي كده
عايزه انطلق...عايزه اجري ...عايزه اروح مكان بعيد عن الزحمه دي كلها اللي بضيع وسطها
بتطق في دماغي اروح لاصحابي...اصحابي بيذاكروا وانا تايهه في الشوارع وبضيع وقت على الفاضي
بدخل عليهم..فاتحين كتب وغرقانين في ورق كتير
بعد فاصل من التهييس والسخافه واله ادب عليا عشان انا مش بذاكر وهضيع السنه و..و..و
ياسمين السخيفه تطالبني اني اشيل الام بي ثري من ودني عشان اسمعهم
بأكد ليها اني سامعه بس مافيش فايده...تبدأ تشد الام بي ثري وانا ارفض رفض تام للفكره
حسيت انهم رخمين وعايزين يروشوا..وانا عايزه ابقى لوحدي
عايزه اتوه اتوووه لحد ماالاقيني وصلت لمكان ثابت اروحلو انا
نزلت من عند اصحابي...ولسا منير مبهدلني
حنين جوانا يحكي وشوق جوانا يبكي والدمع ساقيه كبت
كمان ساعتين بلاقيني ادام البيت...مش عارفه رجعت ليه ومش عارفه مشيت كل المسافه دي ازاي
بطلع في الاسانسير وارن الجرس..عمر اخويا بيفتح وهو بيدحك الدحكه الهاطله بتاعتو
بياخد الشنطه ويقولي جبتي ايه...زي كل مره بزعق وبقوله مش بحب اول ماادخل تقلبني كده
ماما بتيجي تزعق وتقولي علاطول كده خناقات مع اخوكي...بحاول اشرح اننا بنهرج بس
لكن لا حياه لمن تنادي...
اختي بتيجي تكلمني وماما تقولي هتاكلي ايه ؟؟
عمر بيسحب منير من وداني بكل عنف طفولي
اختي بتسألني مالك متنحه ليه ؟
سبتها ودخلت ادوتي وقفلت على نفسي
ماعرفتش ارد اقولها ايه....مش عارفه مالي
ولو حتى عارفه...مش عايزه اقول ولا عايزه احكي
مش طالبه

we2am

هرتـــله

همشي...وسيبني امشي
ماحدش يقولي ليه
ماتقوليش على فين رايحه
سيبني امشي في طريق طويل
في آخره نور...مع اني مش شايفاه
سيبوني ابكي
ماحدش يقولي اهدي
سيبوني اصرخ واقول مش قادره
ماتقوليش اصبري واتحملي
سيبوني اكون مع نفسي
اعاتبها واعذبها
سيبني اقسى عليك
ولو ماعرفتش اقسى....خليك قاسي انت
ماتقوليش مش فارقه وماتبكيش
لا فارقه ومش هجمد ولا هدحك
سيبني انادي عليك وماتردش عليا
سيبني اصرخ لحد مالصوت يروح
واعرف انك ماتستاهش اناديك
سيبني امشي...لوحدي
حتى لو هموت...ماحدش ييجي
سيبوني اعلم نفسي اني اموت لوحدي

we2am