مش عارفة أبدأ البوست إزاى
أكيد أول بوست فى البلوج بتاعى أنا و أوما لازم يكون حاجة كده مميزة وحدث فريد فى حياتنا
فضلت مستنية هى تبدأ وتنزل أول تهييسة بس أتأخرت بقى قلت أبدأ أنا
وبعدين أنا الكبيرة يبقى أنا اللى أبدأ
عايزة أقولها ميرسى الأول عشان هى اللى عملت البلوج
ندخل فى الموضوع بقى
متوترة جداً من إمبارح وسهرت بليل أكل فى ضوافرى ومش عارفة هتخلص من العادة دى امتى والتوتر أمتد لشعرى بس طبعاً مكلتوش بس قعدت العب فى قصتى كده وحالتى كانت صعبة
هتجنن
أكتر لحظة كنت بكرهها فى حياتى لحظة أتخاذ قرار مصيرى هتتوقف عليه حاجة مهمة فى حياتى
أومال بقى لو حياتى كلها هتتوقف على القرار ده
وهو قرار الأرتباط طبعاً
كانت مرحلة فظيعة بقى عشان أقدر أخد القرار بس الحمد لله خدته بسهولة وده اللى طمنى
إن ربنا كان ميسر الموضوع وأن الأهل كلهم كانوا مرحبين بيه
يمكن استغربت عشان أنا من النوع الرومانسى اوى والرومانسى بتاع زمان ده اللى عايز حبيبه يجيله بجيتار يغنيله تحت البيت ويوم ما ارتبطت متكونش قصة حب طويلة
هو صحيح مش جواز صالونات وصحيح أنا اعرفه من يوم ما اتولدت بس أخر حد كنت اتوقعه مع ان الموضوع اتفتح كتير
المهم
وافقت
وقد كان
والخطوبة إن شاء الله بعد أسبوعين
وابتدت الأسئلة
طب هو مبسوط يعنى ... طب هو بيفكر زى منا بفكر كده ... يا ترى هو فعلاً عارف ومقدر هو مقبل على ايه ؟؟؟
وابتدت بقى حكايات الخطوبة
هى صحيح قراية فاتحة وتلبيس دبل وحاجة عائلية المفروض
بس لازم فى ناس معينة من قرايبنا وقرايبه يجوا
طب هنعزم مين وهنجيب ايه وهنقدم ايه ومواويل
مستنية النهاردة عايزة اتكلم معاه جد شوية
عندى ليه أسئلة كتير
طبعاً أنا مبسوطة من جوايا
يمكن مش قادرة أخبى قلقى
بس مبسوطة
وعايزة كل الناس مبسوطين معايا
عايزة أقول لخوخة وأوما انى عمرى ما هبعد عنكوا
أنكوا احلى حاجة فى حياتى
أنتوا اللى هتقفوا جنبى فى كل خطوة
أنتوا اللى هتشجعونى
انتوا اللى هتوصوا رامى عليا
بحبكوا اوى
وبحبك يا اوما عشان البلوج ده
ويلا بقى عايزين نشوف تهييسك انتى كمان
NoHeR
