وحشتني هاجر اختي اووي
وحشتني قعدتها معانا في البيت ...وحشتني سهراتنا بليل
وحشني اهيس انا وهي بليل ونلعب اتوبيس كومبليت زي الهبل وماما تصحى الفجر تلاقينا تقولنا بتعملوا ايه نقولها بنلعب تجنن علينا وتقول ربنا يهديكو وتنام تاني...وحشني ارغى معاها وافضل ادحك وتلاقيني في وسط الكلام بعيط وهي تفضل تقولي انتي مش بتعيطي صح قوليلي انك مش بتعيطي وتفضل تدحك زي العبيطه لحد ماتدحكني
وحشني اني اصحيها وهي مش ترضى تصحى وانا ازهق منها واقول توظ فيها ومش هصحيها والاقيني كمان ربع ساعه راجعه ليها وافضل وراها لحد ماتصحى
وحشتني المكرونه المعجنه اللي كانت بتعملها بليل وكل يوم تقول هتتظبط ومش بتظبط
على فكره انا بقيت اظبطها دلوقتي ياجوجو
وحشني وجودها معايا في البيت,,من يوم مااتجوزت واحنا مش بعدنا ولا يوم,,لكن واحشني وجودها معايا في بيتنا
*************************
منه وهبه روح قلبي وحشوني اووي
هم بنات عمتي,,عندهم دلوقتي سنتين تقريباً,,وبجد بعتبرهم حته مني
وحشوني جداا
هم المفروض نازلين كمان شهرين ان شاء الله
انا بعد الايام والليالي لحد ماييجوا,,نفسي آخدهم في حضني بقى واحس بيهم معايا
نفسي يباتوا معايا يوم واحد بس وافضل طول الليل مش عارفه انام عشان خايفه واحده منهم تصحى
وحشتني منه وهي بتضربني وبتبصلي بغل اوي وانا بلاعب هبه
وهبه السوسه لما كنت آلاعب منه وانساها شويه كانت تعض منه ومنه تيجي تعيطلي وتشاورلي على مكان العضه وتبص لهبه بحزن كده
بجد من اكتر الناس اللي واحشاني وغيابهم مأثر عليا اووي
مش متخيله لما اشوفهم تاني هعمل فيهم ايه
*************************
الفيلا في البلد وحشتني اووي
عايزه اروح اعد هناك كام يوم ,,, ويبقى هناك عمو واخواتي كلهم وولاد عمي
ونسهر بليل في الجنينه ونلعب سبين ذا بوتيل ونشرد بعض
دايماً في الاخر ناس بتزعل وناس بتشيل من ناس لكن مزاج عندنا نشرد في بعض
وحشتين سهرتي بليل مع ولاد عمي ,,, والعياط اللي بعيطو دايماً بليل هناك
مش عارفه اشمعنا لكن الجو بليل بيكون مثالي للعياط
*************************
وحشني اتلم مع اصحابي ونتجمع كلنا
ناكل في مطعم او نعد في كافيه ونهيس وندحك
بقالي كتير اوي مش اتجمعت مع اصحابي كلهم
وحشني قعدتي في كوك دور وانا باكل سندوتش وعماله اوقع على نفسي كاتشب وابهدل الدنيا
دايماً بيقولولي انتي مالكيش اكل في مطاعم
لكن انا بردو مصره
*************************
وحشني انام بليل هاديه ومرتاحه
مش عايزه افكر قبل ماانام ,, ومش عايزه احلم
نفسي انام من غير مااحلم
عايزه انام هاديه ومستقره ,,, مش عايزه اقلق في النص
ولا ابقى طول الليل حاسه اني مش مكتوبلي انام
************************
وحشني ابقى مع نهير وياسمين
وحشوني اووي
عايزه انزل وسط البلد معاكي ياياسو
بس مش تقلقي ياياسمين مش هنعمل حاجات وحشه
هبقى مؤدبه والله
ووحشني اروح حديقه الحيوانات معاكي يانهير
مع اني لسا ماحفظتهاش وهنتوه بردو
بس بردو عايزه اروحها معاكي تاني
او ممكن نروح الهرم ,, ونركب خيل مع بعض
ولو عايزه ياستي ابقى هاتي حد معاكي ;)
وحشوووني اوي بجد العيال دول
************************
*
وحشني اني افرح من غير مااخاف
وحشني ارتاح ,,, واصدق ان اكيد اللي جاي احسن
*************************
وحشني البس لبس صيفي
زهقت من الكم والهيكول
زهقت من الزحمه في اللبس دي
عايزه اتحرر بقى
*************************
وحشني الشيكوليت كيك
هي عباره عن بوريو متفرفت حتت صغننه اوي
وعليه شيكولاته ولبن
حاجه كده تحفه
غالباً بشربها مع اصحابي
بس بقالنا كتير اوي مش اتجمعنا مع بعض
*************************
وحشتني انا...
وحشني ابقى انا
وحشني اتكلم واقول
اللي بتخبي دي مش انا
عايزه ابقى انا
*************************
وحشتني حاجات كتيره اوي
وحشتني كل حاجه حلوه انا مفتقداها دلوقتي
we2am
