ماشيه في الشارع...مش عارفه رايحه فين ولا عارفه ماشيه لحد امته
شارع زحمه وناس رايحه وناس جايه
عماله بتفرج على الناس وكأني بدور على حاجه....جايز بدور على حد شبهو...جايز بقرا وشوش الناس وخلاص
بنت وولد ماشيين واديهم في ادين بعض..بس عنيهم كدابه..هم الاتنين بيشتغلوا بعض..باين جداً انهم بس بيعيشوا الدور
زهقت من مناظر الناس..زهقت من الوشوش المكشره والعيون الكدابه
كل الناس اشتركوا في تشكيره واحده ونظره عدوانيه واحده
زهقت من الاغاني الكئيبه اللي على الام بي ثري اللي عماله بسمعها
شجر اللمون...دايره الرحله...اد ايش كان فيه ناس
بفضل اقلب في الام بي ثري لحد اما الاقيها...اديا في جيوبي
بنكشح وافضل اغني معاها واشوف كل الوشوش المكشره سراب مالوش تاثير عليا
تبدأ خطوتي تسرع وابدأ اغني مع منير...وحدي لكن ونسان وماشي كده
عايزه انطلق...عايزه اجري ...عايزه اروح مكان بعيد عن الزحمه دي كلها اللي بضيع وسطها
بتطق في دماغي اروح لاصحابي...اصحابي بيذاكروا وانا تايهه في الشوارع وبضيع وقت على الفاضي
بدخل عليهم..فاتحين كتب وغرقانين في ورق كتير
بعد فاصل من التهييس والسخافه واله ادب عليا عشان انا مش بذاكر وهضيع السنه و..و..و
ياسمين السخيفه تطالبني اني اشيل الام بي ثري من ودني عشان اسمعهم
بأكد ليها اني سامعه بس مافيش فايده...تبدأ تشد الام بي ثري وانا ارفض رفض تام للفكره
حسيت انهم رخمين وعايزين يروشوا..وانا عايزه ابقى لوحدي
عايزه اتوه اتوووه لحد ماالاقيني وصلت لمكان ثابت اروحلو انا
نزلت من عند اصحابي...ولسا منير مبهدلني
حنين جوانا يحكي وشوق جوانا يبكي والدمع ساقيه كبت
كمان ساعتين بلاقيني ادام البيت...مش عارفه رجعت ليه ومش عارفه مشيت كل المسافه دي ازاي
بطلع في الاسانسير وارن الجرس..عمر اخويا بيفتح وهو بيدحك الدحكه الهاطله بتاعتو
بياخد الشنطه ويقولي جبتي ايه...زي كل مره بزعق وبقوله مش بحب اول ماادخل تقلبني كده
ماما بتيجي تزعق وتقولي علاطول كده خناقات مع اخوكي...بحاول اشرح اننا بنهرج بس
لكن لا حياه لمن تنادي...
اختي بتيجي تكلمني وماما تقولي هتاكلي ايه ؟؟
عمر بيسحب منير من وداني بكل عنف طفولي
اختي بتسألني مالك متنحه ليه ؟
سبتها ودخلت ادوتي وقفلت على نفسي
ماعرفتش ارد اقولها ايه....مش عارفه مالي
ولو حتى عارفه...مش عايزه اقول ولا عايزه احكي
مش طالبه
we2am
8 comments:
نسيتى تكتبى وئام فى الآخر مع ان كده كده بيكتبوا بوستد باى اوما
الحالة دى فكرتنى بواحدة صاحبتنا برضه ساعات هى نفسها بتبقى عايزة تعرف هى مالها
يمكن الأحداث بتختلف بس النتيجة واحدة
بصى يا اختى
كلنا بنحس بكده وبالذات وقت الامتحانات
الواحد بيبقى مش طايق الكتب ولا الناس اللى بتذاكر ولا الناس اللى بتقوله ذاكر
بس هنعمل ايه لازم نستحمل الكام يوم بتوع الامتحانات عشان ربنا يكرمنا
اهو روحى عن نفسك شويه وبعدين نذاكر سويه
وربنا يوفقنا
قولى امين
احلى حاجه فى القصه دى انك بتسمعى منير
ana kman ba7es bkda
عارفه احساسك ده ومقداراه
انتى اصغر من اولادى بس لما
كنت فى سنك كان بيحصل كده
وقت الأمتحانات كانت الدنيا
طالبه اى حاجه غير المذاكره
بس الحمد لله كنت بفوق لما افتكر
تعب والدى ووالدتى معانا علشان
ننجح ربنا معاكى وتقدرى تذاكرى
ومافيش مانع من شويه ترفيه
بس انتى عبرتى بصدق عن اللى بيحصل
ربنا ينجحك ويكتب لك كل خير
على فكره مدونتك جميله ودمها خفيف
سلامى
اصعب شىء فى الدراسه الامتحانات بجد
واجمل سنين عمرك هى ايام الدراسه ربنا يوفقك وبنجحك
بس بلاش كل الزعل والاككتئاب ده
مش لوحدك بتسمعى منير بس على فكره كان يومك لذيذ جدا
على فكره تانى دقيقه الموبايل على المريخ ب 10 دولار افترا بقى
ماشي في الشارع ومعايا ناس تانين ناس بتضحك وناس بتبكي وناس بتشتغل ناس تانين وناس ماشيه مكشره وناس ايدايه مشمره علشان تضرب ناس تانين ويا علم مين في الاخر هايغلب مين
انا حر في الشارع وشارع الحياه هايمنع مين اغاني او اجري او احب وكتير بشوف ناس عينهم كدابين ويا علم السكه اخره هايبقي فين
www.aboelhassan.blogspot.com
مع تحيات الشاعر
احمد ابو الحسن
Post a Comment